Ọ̀wọ̀n dúdú Ṣalamaneseri III

Ọ̀wọ̀n òkúta oníhà mẹ́rin yìí, tí gíga rẹ̀ jẹ́ nǹkan bí mítà 2, ṣe àkọsílẹ̀ àwọn ogun Ṣalamaneseri III (Shalmaneser III) ọba Asiria ní ọdún 31 àkọ́kọ́ ìjọba rẹ̀. Austen Henry Layard wú u jáde ní ọdún 1846 ní Nimrud, ìlú Kala àtijọ́ ti Asiria, ó sì wà ní British Museum báyìí. Ìlà àwòrán gbígbẹ́ márùn-ún yí gbogbo ìhà mẹ́rẹ̀ẹ̀rin rẹ̀ ká, pẹ̀lú ìkọ̀wé onígun (cuneiform) láàrín wọn, wọ́n sì fi owó òde tí a mú wá láti ilẹ̀ márùn-ún nínú ìjọba náà hàn.

Nínú ìlà kejì, ọkùnrin kan kúnlẹ̀, ó dojú bolẹ̀ níwájú ọba, nígbà tí àwọn ọmọ Israẹli ń gbé ẹ̀bùn lẹ́yìn rẹ̀. Ìkọ̀wé náà pè é ní “Jehu, ọmọ Omri”, ó sì ka owó òde rẹ̀: àwokòtò àti ohun èlò fàdákà àti wúrà, tánganran àti ọ̀pá ọba kan. Òun nìkan ni àwòrán ọba Israẹli tí a mọ̀ tí a ṣe nígbà tí ó wà láàyè. A san owó òde náà ní ọdún 841 Ṣ.K., nínú ìpolongo ogun kan náà tí Ṣalamaneseri fi bá Hasaeli ti Damasku jà, Bíbélì kò sì mẹ́nu kàn án. Jehu kì í ṣe ti ìdílé Omri — òun ló bì í ṣubú (2 Ọba 9–10) — ṣùgbọ́n àwọn ará Asiria ń bá a lọ láti máa pe ìjọba Israẹli ní orúkọ Omri.