Lubos na Pinupuring Dakilang Martir Eufemia

Si Eufemia ay anak ng isang senador, si Filofrono, sa Calcedonia, sa kabila ng kipot mula sa Constantinopla. Ayon sa kaniyang Talambuhay, sa panahon ni Diocleciano ay iniutos ng prokonsul na si Prisco sa lahat na makibahagi sa isang pista ng diyos na si Ares. Si Eufemia ay isa sa apatnapu't siyam na Kristiyanong natagpuang magkakasamang lihim na nananalangin at tumatangging gawin ito. Pagkatapos ng labinsiyam na araw ng pagpapahirap, ang kaniyang mga kasama ay ipinadala sa emperador, habang siya ay iniwan upang subukin nang mag-isa.

Isinasalaysay ng Talambuhay ang maraming pahirap na nalampasan niya, kabilang ang gulong, apoy, isang hukay ng mga ahas at mababangis na hayop, bago namatay c. 304 mula sa kagat ng oso. Inilibing siya ng kaniyang mga magulang malapit sa lungsod. Ang kaniyang libingan ay naging lugar ng peregrinasyon, at noong 451 ay nagpulong ang Konseho ng Calcedonia sa basilikang itinayo sa ibabaw nito.